УБЕГ-ын Бүртгэлийн газрын орлогч дарга Г.Энхтайванаас зарим зүйлийг тодрууллаа.
-Гадаад паспортын хэлтсийн ачаалал эрс ихэссэн тухай мэдээлэл байна. Ямар арга хэмжээ авч байгаа вэ?
-Зуны дэлгэр цаг эхлэхээр гадаад паспорт авах иргэдийн тоо өсдөг. Энэ нь аялал жуулчлалаар гадагшаа явах иргэдийн тоо өссөн. Нөгөөтэйгүүр, Солонгос улсад хөдөлмөр эрхлэх иргэдийн бүртгэл эхэлсэнтэй холбоотойгоор ачаалал эрс нэмэгдэж байна. Тиймээс өнөөгийн байдлаар манай нэг ч ажилтан амраагүй, энэ ачаалалтай үеийг дуустал ажиллана.
-Хэдэн хувиар ачаалал өссөн гэсэн үг вэ?
-Жилд манайх дунджаар 200 мянган иргэнд гадаад паспорт гаргаж өгдөг. Гадаад паспорт авахад шаардлагатай баримт бичгээ бүрдүүлсэн бол ажлын 7-10, яаралтай бол гурван хоногт гаргаж өгч байгаа.
-Тэгэхдээ сонгууль дөхөж буй энэ үед хэчнээн бүрэлдэхүүнээрээ ажиллаад ч нэмэргүй юм биш үү?
-Тийм ээ. Ачаалал эрс нэмэгдэж байгаатай холбогдуулан гадаадад зорчих бүртгэлийг дөрвөн дүүрэгт шилжүүлсэн. Өөрөөр хэлбэл, Баянзүрх, Сонгинохайрхан, Баянгол, Чингэлтэй дүүргийн иргэний бүртгэлийн хэлтэст шилжүүлэн гадаад паспорт олгож буй. Дээрх дүүргийн иргэдийн хувьд заавал 100 айл дахь төв байрнаас авна гэхгүй амар болж байгаа. Манай гадаадад зорчих бүртгэлийн хэлтсийн хувьд үйл ажиллагаагаа хэвийн явуулж байна.
-Зарим хүн хүүхдэд заавал гадаад паспорт гаргуулах шаардлагатай юм уу. Хүнд сурталтай, мөнгө авах гэсэн арга хэмээн шүүмжлээд байх юм?
-Өмнө нь, эцэг, эх нь хүсвэл хүүхдэд нь гадаад паспорт гаргаж өгч байсан шүү дээ. Гэвч сүүлийн жилүүдэд хүний наймаатай холбоотой гэмт хэрэг их гарч байгаа учраас Цагдаагийн Ерөнхий газраас зөвлөмж ирсний дагуу гадаад паспорт олгодог болсон. Ингэснээр бүртгэл нь ч сайжирч байна гэсэн үг.
