Иргэний нийсэхийн ерөнхий газар одоогоор гадаадын 30 гаруй улстай харилцаатай ажилладаг. Тус газрынхан Монголын агаарын тээвэрт харилцан ашигтай байдлаар зарим гэрээг шинэчилжээ. Тухайлбал, БНКазУ, Турктэй шинэчилсэн гэрээ байгуулж, Улаанбаатар-Астана, Улаанбаатар-Алматагийн чиглэлд шууд нислэг хийхээр болсон байна. Гэхдээ хэзээнээс нислэгээ үйлдэж эхлэхээ одоохондоо товлоогүй байгаа гэнэ. Түүнчлэн Туркийн Станбул-Улаанбаатарын чиглэлд, БНСУ-ын Чежү, Пусан, Тайландын Бангкок зэрэг хот руу шууд нислэг хийхээр бэлтгэл хийж байна. Мөн Улаанбаатараас Лондон, Япон, АНУ-ын баруун эргийн хотууд руу шууд нислэг хийхээр тухайн улсын эрх зүйн боломжийг судалж байгаа гэнэ. Эдгээр хэлэлцээг энэ онд амжихгүй бол ирэх жил бүтээнэ хэмээн төвлөж буйгаа албаныхан хэлжээ.