“Microsoft” компани Хятад дахь өөрийн компанийн ажилтнуудад өөрийн хүсэлтээр ажлаар гарвал “Lumia 630” ухаалаг утас амалсан байна. “Microsoft”нь “Nokia” компанийг өнгөрсөн дөрөвдүгээр сарын 25-нд худалдан авсан бөгөөд цагтаа алдартай байсан брэндийг дагаад дэлхий даяар тархсан 30 мянган ажилтныг давхар авчээ. “Nokia”-г худалдан авахад гаргасан зардал нь “Microsoft”-ын ашгийн хэмжээнд нөлөөлж эхэлсэн тул зардлаа аль болох багасгахаар шийдсэн байна. Үүний тулд худалдан авсан компанийха 30 мянган ажилтнаас 18 мянгыг нь цомхотгох болсноо албан ёсоор зарласан юм. Энэ цомхотголын хүрээнд Бээжин дэх “Nokia”-ийн судалгааны төвийн 4,5 мянган ажилтнуудын дунд цомхотгол явуулж зөвхөн 300-г нь үлдээхээр шийджээ. Гэвч ажилтнууд ажил хаях гэх мэт янз бүрээр эсэргүүцлээ илэрхийлж байгаа нь цомхотголыг олны анхаарал таталгүй чимээгүй, хурдан явуулах чармайлтыг нь талаар болгож байгаа тул ийнхүү саналаараа халагдсан хүнд смартфон бэлэглэж байгаа аж. Утаснаас гадна гэнэт халагдсаны нөхөн олговрыг ч өгнө.
“Lumia 630” смартфоныг Хятадын жижиглэн худалдаанд 800 юаниар зардаг.