Украинд болж байгаа дотоодын зөрчил, мөргөлдөөнд Орос улс оролцож байна, оросыг дэмжигч салан тусгаарлагчдад Орос зэвсэг нийлүүлж байна гэсэн шүүмжлэлийг  барууныхан ярьсаар. Үнэхээр ч Украины эрх баригчдын өнөөгийн бодлогыг эсэргүүцдэг орос гаралтай иргэд хэчнээн дургүй байлаа ч тэдэнд танк, агаараас эсэргүүцэн хамгаалах хэрэгсэл, хуягт тээвэрлэгч хэн нийлүүлж байгаа вэ. Өнгөрсөн өвөл  Украины нийслэл  Киевт болж байсан Майданы үеэр украин иргэдийн гар дээр 3,0 сая орчим буу байгаа гэсэн мэдээлэл гарч байсан. Гэхдээ  гэртээ орон дороо  танк, агаараас эсэргүүцэн хамгаалах орчин үеийн тийрэлтэт пуужин, танк эсэргүүцэх их буутай  нуучихсан айл гэж байх уу. Чухамдаа ийм л болохоор энэ бүхнийг салан тусгаарлагчдад ОХУ нийлүүлж байгаа гэсэн хардлага явсаар байгаа юм. Энэ талаар ч Европ дахь НАТО-гийн цэргийн командлагч генерал Филипп Бридлав Пентагонд хийлгэсэн хэвлэлийн бага хурал дээр “Украины зүүн хил дээр болж байгаа үйл явдлаас бид салан тусгаарлагчид  хүнд зэвсэглэл, хуягт тээвэрлэгч, агаараас эсэргүүцэн хамгаалах хэрэгсэл ашиглаж байгааг харж байна. Эдгээр зэвсгийг украины хилийн зүүн талд оросууд хээрийн сургууль хийж байхдаа ашиглаж байсан бол одоо тэдгээр нь  хилийн баруун талд орж ирэн босогчдын гар ороод байна” гэж мэдээлжээ.
Ийм болохоор л америкийн болон европын хэвлэл мэдээллийн хэрэгслээр украинд явуулж байгаа оросын бодлогыг хурцаар шүүмжилж АНУ, болон ЕХ-ноос оросын эсрэг авч байгаа хориг арга хэмжээг зөв хэмээн бичсээр байгаа юм.
Оросын эсрэг хориг нь юун түрүү  оросын нефть, байгалийн хийг авахаас татгалзах. Дараа нь оросоос хүнсний бүтээгдхүүн загасны  түрс, архи, үслэг эдлэл импортлохоо зогсоох явдал.
 Улс төрийн бодлогын үүднээс ОХУ-д шахалт үзүүлж ганцаардуулах гэсэн энэ хоригийн талаар  бизнесийн төлөөллүүд харин эсрэг байр суурьтай байгаа юм.
Зургадугаар сарын 26-нд америкийн бизнесийн хэд хэдэн холбоо нийгэмлэг энэ бүх хориг нь АНУ-д ихээхэн хохирол авчирна гэж мэдэгдлээ. “Оросын эсрэг хоригийг америкийн бизнесмэнүүд шүүмжилж байна” гэсэн гарчигтай өгүүлэл Financial Times сонинд гарсан байна. АНУ-ын худалдааны танхим, Үндэсний үйлдвэрлэгчдийн нийгэмлэг зэрэг бизнесийн байгууллагууд The New York Times, The Wall Street Journal и The Washington Post сонинуудын зар сурталчилгааны талбайг худалдан аваад оросын эсрэг хоригийг хүлээн авахгүй гэдгээ тавьж байна.
Чухам үнэндээ Оросын эсрэг энэ хоригоос болоод америкийн бизнес европын зах зээл дээр  хятадтай хийх өрсөлдөөнд ялагдана гэж эмзэглэж байгаа юм. Бизнесийн төлөөллүүд ЗХУ-ыг афганистанд цэргээ оруулсныг эсэргүүцэн үр тариа нийлүүлэхээс татгалзаж байсан Жимми Картерын үеийн хоригийг цуцалсан Рональд Рейганы жишээг дагахыг АНУ-ын ерөнхийлөгч Барак Обамад зөвлөж байна.
Европын бизнесмэнүүд ч орост оруулдаг хөрөнгө оруулалтын нь орон зайг Персийн блуангийн орнууд, Хятадууд эзэлнэ гэж эмээж байгаа юм. Ялангуяа Германы бизнемэнүүд Оросын эсрэг хоригийг хамгийн ихээр шүүмжилж байна. Германы химийн үйлдвэрлэлийн BASF концерн, Siemens, Volkswagen, Adidas компаниуд Холбооны канцлер Ангела Меркелийг оросны эсрэг бодлогоосоо татгалзахыг уриалсаар байна. Оросын нутаг дэвсгэрт немцийн 6200 орчим компани ажилладаг юм байна. Германчууд оросоос нүүр буруулбал Германы эдийн засгийн өсөлт хоёр хувиар буурна гэж Килийн их сургуулийн шинжээчид тооцжээ.
Орост үзүүлэх эдгээр хоригийн эсрэг байр суурьт зургадугаар сард Итали улс нэгдэж Австри, Испани, Кипр, Грек, Словак, Унгар, Болгарыг дэмжиж эхэллээ. Энэ орнуудын хувьд оросын импорт, жуулчдын урсгалаас хараат гэхэд болно. Үнэндээ тэд оросоос дээр хэлсэн бараануудыг авахаа больж, жуулчдыг нь хүлээн авахаа боливол  эдийн засаг нь яах нь тодорхой. Болгар л гэхэд эхлээд Оросын эсрэг хоригийг дэмжиж байсан боловч тавдугаар сард шинэ хоригийн эсрэг боллоо. Хэргийн учир нь энэ улсын нефть боловсруулах ганц үйлдвэрийг  нь оросын “Лукойл” хянадаг, улсдаа ганц Атомын цахилгаан станц нь оросын түлшээр ажилладаг юм. Ер нь орос бол Болгарын худалдааны хоёр дахь том түнш. Ингэхээр л энэ улсын 2000 орчим компани Оросын эсрэг хоригт нэгдэх гэсэн улстөрийнхөө бодлогыг няцаахад хүрч байгаа юм.
Үнэхээр  ийм хориг эхэлснээс хойш ОХУ-ын эдийн засгийн бодлого, харилцаа зүүн өмнөд Ази руу улам ихээр чиглэж байгаа нь барууны бизнесменүүдийн сэтгэлийг зовоож байгаа. ОХУ,  Хятадтай, зүүн өмнөд азийн орнуудтай улам их найзалж дотносч байна. Шанхайн хамтын ажиллагааны болон БРИКС-ийн орнууд руу элгэмсч элдэв гэрээ бичигт гарын үсэг зуран байгалийн хийгээ бараг л сул өгнө гэж саймширч байгаа нь барууны, европын бизнесменүүдийн шээсийг гоожуулах гэж байгаагаас тэд улстөрчдөд шахалт үзүүлж байгаа нь энэ.
Юутай ч Украинаас болж их гүрний түрэмгий бодлогыг хазаарлах гэсэн улс төрийн бодлого, их мөнгөний төлөө гэсэн бизнесийн ухаан хоёр зөрчилдсөөр байна.
Чухамдаа хамгийн сүүлийн үеийн зэвсгээр байлдаж байгаа салан тусгаарлагчид, украинд болж байга аүйл явдлын талаарх оросын суртал нэвтрүүлэг зэргийг хараад ямар ч хүн үнэн учрыг нь ойлгож байгаа ч үүнээс илүүтэй мөнгө харагдаад байгаа нь гарцаагүй үнэн.