Америкийн Миннесот мужийн 17 настай сурагч Жон Ладью гэр бүлийнхнээ алж, сургуулиа дэлбэлэх гэж хэдэн сарын турш дэлбэрэх бодис цуглуулж бэлтгэсэн байсныг цагдаагийнхан энэ аймшигт ажиллагаа болохын өмнөхөн мэдэж саатуулсан байна. Түүнийг дэлбэрэх бодис цуглуулаад байгааг нэг хүн санамсаргүй мэдэж цагдаад мэдэгдсэнээр сурагчийн гэрт нэгжлэг хийх үед бараг л тэсэрч дэлбэрэх бодисын агуулах гэмээр зүйл гарсан байна. Энд дарь, тэсэлгээний бодис, дотор нь дэлбэрэх бодис хийсэн  түргэн буцалгагч, буу зэвсэг байжээ.  Байцаах үеэр тэр “Би хамаг л цагаа тэсэрч дэлбэрэх бодис хэрхэн бэлтгэхийг судлахад зориулдаг байсан” гэж ярьсныг ИТАР-ТАСС иш татжээ. Үнэхээр  ч тэрээр тэсрэх бөмбөг гурвыг бэлтгээд өөрийнхөө орон дор хадгалж байсан нь гарсан байна. Өөрийнх нь ярьснаар бол Жон Ладью гэр бүлийнхнээ хөнөөгөөд дараа нь сургуулиа дэлбэлж, сурагчдыг буудах гэж байснаа хүлээсэн байна.