ОХУ-ын Дотоод яамны генерал Борис Колесников авлигын хэрэгт сэижглэгдэн шалгуулж байхдаа байцаалтад очихдоо харгалзаж явсан ажилтны хөл рүү өшиглөөд тагт руу гүйн гарч зургаан давхраас үсэрч амиа хорлолоо гэж Оросын Мөрдөн байцаах албаны албан ёсны төлөөлөгч Владимир Маркин мэдээлсэн байна. Колесников түүнийг албан тушаалаа хэтрүүлэн, авлига авсан зэрэг хэргийг үндэслэлгүй гэж няцааж байсан ч үүний өмнө хоёр ч удаа амиа хорлохыг завдаж байжээ.
Хошууч генерал Колесников бол ОХУ-ын ДЯЯ-ны системд хамгийн залуу ердөө 36 настай генерал байсан байна. Колесников, түүний дарга байсан Денис Сугробов, өөр хэд хэдэн албан тушаалтныг албан тушаалаа хэтрүүлсэн, гэмт хэрэгтнүүдийг халхалсныхаа төлөө сард 10,0 мянган долларын авлига авч байсан хэрэгт сэжиглэн шалгаж байсан юм. Хууль сахиулагчид гэмт хэрэгнүүдийг халхлах, авлига авах энэ бүхий л арга хэмжээг зохион байгуулагч нь Колесников байсан гэж үзэж байгаа юм.