БНХАУ-ын Гадаад харилцааны яам тус улсад суугаа Америкийн Элчин сайдыг яаралтай дуудан уулзсан байна. Аливаа нэг улсын Элчин сайдыг яаралтай дуудна гэдэг хоёр улсын харилцаанд ноцтой асуудал үүссэний шинж.

Америкчууд Хятадын армийн таван офицерыг нэр заан кибер тагнуул хийсэн хэрэгт буруутгасныг эсэргүүцэн ийм онц арга хэмжээ авсан байна. Америкийн үйлдлийг хятадууд “Олон улсын хамтын ажиллагааны хэм хэмжээг ноцтой зөрчсөн хэрэг бөгөөд АНУ, БНХАУ хоорондын харилцан итгэлц­лийг алдаг­дуулж байна” гэж тодорхойлон эрс шүүмжлээд кибер аюулгүй байдлыг хангах талаар хоёр улсын хамтарсан ажлыг бүлгийн ажиллагааг зогсоож байгаагаа мэдэгдэв.
Америкийн Ерөнхий прокурор Эрик Холдер “Аме­рикийн компаниудын эсрэг явуулсан энэхүү кибер дай­ралт Хятадын төрийн мэд­лийн компаниу­дад шаард­ла­гатай мэдээллийг хул­­­­гай­­лан АНУ-ын бизнест хо­­хи­­рол учруулах гэсэн ганц зорилготойгоор зо­хион байгуулсан” гэж тайл­бар­лажээ.  Холбооны мөрдөх тов­чоо­ноос гаргасан мэдээнээс үзвэл Хятадын армийн 61398 дүгээр анги буюу кибер тагнуулын ангийн албан хаагчид 2006-2014 онд төрийн хөрөнгө оруулалттай хятад компаниудад зах зээлд өрсөлдөх давуу боломж олгох зорилгоор удаа дараалан кибер дайралт хийж, америк компаниудын нууц материалыг хулгайлан дамжуулсны улмаас Америк багагүй хохирол амссан аж. Кибер дайралт хийсэн гэж буруутгагдаад байгаа Хятадын армийн таван офицер нь таван компани, нэг үйлдвэрчний эвлэлийн арилжааны нууц мэдээлэл ба бүх дотоод баримт бичгийг хулгайлсан.

Америкийн Ерөнхий про­­ку­­­рор  “Бид Америкийн ком­­­паниуд, арилжааны сал­барт өрсөлдөх давуу эрх олгохын тулд нууц мэ­дээлэл цуглуулдаггүй гэдгийг Ерөнхийлөгч Обама удаа дараалан онцолж байсан” гэв. Америкийн Хууль зүйн яамны дэргэдэх Үндэс­ний аюулгүй байдлын депар­таментын дарга Жон Карлин бүр ч хатуу мэдэгдэл хийсэн байна. Тэрээр “Шанхайд ком­пьютерийн ард суун америк бизнесменүүдээс хулгай хийдэг хүмүүсийн нэрийг бид анх удаа олон нийтэд ил болгож байна. Манай бизнесменүүд дэл­хийн зах зээлд өрсөлдөх стратеги боловсруулах, инновацыг бий болгоход ажлын цагаа зарцуулж байх хооронд 61398-р ангийн эдгээр офицер Шанхайд суугаад бидний хөдөлмөрийн үр шимийг хулгай хийхэд ажлын цагаа зарцуулж байна” гэжээ.

Америкчууд хулгайлагд­сан мэдээллийн жишээ бол­гож “SolarWorld” компанийн нарны зайг дурдав. Энэ компа­ни Хятадын армийн хакеруудын дайралтад өрт­сөн таван компанийн нэг. Хакерууд тус компаниас бүтээг­­дэхүүний үнэ өртөгийг босгох нууц мэдээлэл хулгайлс­ны дараагаар Хята­дын компаниуд зах зээлд ойролцоо чанартай ч илүү хямд нарны зай нийлүүлэх замаар америк компанийг шахаж эхэлсэн байна. Хятад хакеруудын дайралтад өртөж нууц мэдээллээ алдсан өөр нэг компани нь  “Westinghouse” гэнэ. Энэ компани Хятадын төрийн өмчит нэгэн компанитай усан цахилгаан станц байгуулахаар хэлэлцээ хийж байхдаа 61398-р ангийн хакеруудын дайралтад өртөн өндөр үр ашигтай төхөөрөмжийн маш нууц эд ангийнхаа зургийг алджээ.

Хятадын тал энэ бүхнийг эрс үгүйсгэж байгаа. Интернэт улс гүрний бүх л салбарт нэвтрэхийн хэрээр кибер аюулгүй байдлын асуудал жил ирэх тусам хурцаар сөхөгдөж байгаагийн нэг жишээ нь энэ.  Дээр нь энэ асуудал Путин, Си Зинпинь хоёрын уулзалтын өмнөхөн сөхөгдөж олны анхаарлыг татаж байгаа нь тохиолдлын зүйл биш бололтой.