АНУ-ын Хууль зүйн яам Швейцарийн “Credit Suisse” банкнаас 1,6 тэрбум ам.долларын торгууль төлөхийг шаардаж байгаа тухай “Ройтер” агентлаг мэдэгдэв. Швейцарийн банкийг баян америкчуудад татвараас бултах, ашиг орлогын бодит хэмжээг нуухад тусласан гэж ийм хэмжээний торгууль төлөхийг шаардаж байгаа юм. Мөнгө угаах, татвараас зугатахад тусладаг оффшор бүсийн тухай дэлхийг хамарсан дуулианы үеэр Америкийн Хууль зүйн яамнаас мөрдөн байцаалт эхлүүлсэн. Мөрдөн байцаалтын явцад татвараас зугатсан асар олон хэрэг илрүүлж, тухай бүрд оролцсон Швейцарийн банкуудыг торгож эхэлсэн. 2009 онд Швейцарийн “UBS AG” банкийг 1,02 тэрбум ам.доллараар торгосон ч харилцан тохиролцсоны үндсэн дээр 780 сая ам.долларыг бэлнээр авч байв. Тиймээс энэ удаад 1,6 тэрбум ам.долларын торгууль төлөхөөр болсон “Credit Suisse” банк бодит байдал дээр хэдий хэмжээний торгууль төлөх вэ гэдгийг бүгд анхааралтай ажиглаж байна.