Африкийн Бүгд найрамдах Ардчилсан Конго улсад 30 сая америк долларын тусламж үзүүлэхээр тус улсад айлчилж яваа АНУ-ын Төрийн нарийн бичгийн дарга Жон Керри амлалаа. Гэхдээ тэрээр нэг нөхцөл тавьсан байна. Одоогийн Ерөнхийлөгч Йосиф Кабила дахин сонгуульд өрсөлдөхгүй гэж амласан тохиолдолд АНУ энэ мөнгийг Конгод шилжүүлэх ажээ. Сүүлийн хэдэн арван жил үймээн самуунтай, эмх замбараагүй байдалтай байгаа Конго улс 2016 онд Ерөнхийлөгчийн сонгууль явуулах ёстой. Энэ сонгуулийнхаа товыг аль болох эртхэн зарлах, хэн нэр дэвшихийг эртхэн тодруулах тусмаа сайн гэж АНУ-ын тал нөхцөл тавьж байгаагийн дээр аль хэдийнэ хоёр дахин сонгогдоод буй Йосиф Кабилаг Үндсэн хуулиа зөрчиж, гурав дахиа дэвших ёсгүй хэмээн гол болзлоо тавьжээ.
АНУ-ын тал тус улсад сүүлийн хэдэн жил 210 сая ам.долларын тусламж үзүүлээд байгаа аж.