Хөдөлмөрчдийн эв санааны нэгдлийн өдрийг угтаж Венесуэлийн Ерөнхийлөгч Николас Мадуро цалин, тэтгэврийг 30 хувиар нэмэхээр амлажээ. Николас Мадуро цалин, тэтгэвэр нэмэх мэдэгдэл хийсэн нь Венесуэлд гурван сар орчим үргэлжилсэн Засгийн газрын эсрэг жагсаал, үймээний дараа иргэдийг аргадсан үйлдэл гэгдэж байна. Цалинг 30 хувиар нэмснээр Венесуэлийн хөдөлмөрийн хөлсний дундаж хэмжээ 4252 боливар /ойролцоогоор 67.5 ам.доллар/  болж байгаа аж. Үүнээс өмнө Венесуэлийн Засгийн газар цалингийн хэмжээг өнгөрсөн гуравдугаар сард 10 хувиар нэмэгдүүлсэн юм байна. Венесуэлд инфляци өнгөрсөн 2013 оны байдлаар 56.2 хувьд хүрч нэмэгдэн, ам.долларын хоригоос шалтгаалсан бараа бүтээгдэхүүний хомсдол үүсч, гэмт хэрэг буурахгүй байгаа нь ард олны тэвчээрийг барж, Засгийн газрын эсрэг жагсахад хүргэсэн юм. Венесуэлийн сөрөг хүчнийхний зүгээс газрын тосоор баялаг орныг зөв удирдаж, хөгжилд хүргэж чадахгүй байгаад Ерөнхийлөгч Николас Мадурог буруутган, огцрохыг шаардаж байжээ. Венесуэльд өнгөрсөн хоёрдугаар сард эхэлсэн Засгийн газрын эсрэг жагсаал, үймээн самууны үеэр 41 хүн амь үрэгдэж, олон зуун хүн гэмтэж бэртсэн байна.
Венесуэлийг 14 жилийн турш удирдсан Уго Чавес өнгөрсөн 2013 онд нас барсны дараа Николас Мадуро түүний орыг залгамжилсан билээ.