Британийн Ноттингам дахь "Sports Direct" дэлгүүрт нэгэн өвөрмөц эсэргүүцлийн хөдөлгөөн өрнөжээ. Тус дэлгүүрт нялх балчир хүүхэдтэй ээжүүд цугларч, хүүхдээ хөхүүлж, эсэргүүцлээ илэрхийлсэн байна. Ингэх болсон учир нь тус дэлгүүрээр өнгөрсөн нэгдүгээр сард үйлчлүүлсэн эмэгтэй хүүхдээ хөхүүлснээс болоод хөөгдөж гарсан удаатай гэнэ. Виолетта Комар хэмээх эмэгтэй аавтайгаа хамт тус спорт барааны дэлгүүрээр үйлчлүүлж байхдаа хүүхдээ хөхүүлжээ. Гэтэл дэлгүүрийн ажилтан ирээд "манай бодлоготой таарахгүй" гэсэн шалтгаанаар түүнийг өөр газар олж хүүхдээ хөхүүл хэмээн шаардсан байна. Энэ явдалд эмзэглэсэн бүсгүй дэлгүүрийн удирдлагад таван удаа гомдол гаргасан боловч огтхон ч авч хэлэлцээгүй учир өөртэйгөө ижил эхчүүдэд хандсан байна. Түүн шиг олон нийтийн газар хүүхдээ хөхүүлж байгаад хөөгдсөн тохиолдол цөөнгүй байдаг учир эмэгтэйчүүд санаачилгаараа нэгдэн, "Sports Direct" дэлгүүрт цугларан, хүүхдээ хөхүүлжээ. Энэ явдлын дараа дэлгүүрийн зүгээс Виолетта Комараас уучлал гуйсан байна. 
