БНАСАУ-г цөмийн шинэ туршилт хийж  бүс нутгийн энх тайван байдалд аюул учруулахгүй байхыг  АНУ-ын эрх баригчид уриаллаа гэж Төрийн департаментын төлөөлөгч Жен Псаки мэдэгдсэн байна. Тэрээр БНАСАУ-ын засгийн газарт олон улсын өмнө хүлээсэн үүрэг, хариуцлагаа ухамсарлахыг сануулжээ. “АНУ-ын ерөнхийлөгч Барак Обамагийн Ази-Номхон далайн орнуудаар хийх айлчлалын босгон дээр Умард Солонгос цөмийн үйл ажиллагаагаа идэвхжүүлж байгаа талаар  америкийн ажиглагчид тэмдэглэж байна” гэж Эрх чөлөө радио станцын мэдээнд дурджээ.
Мөн Умардын Пхунгери дэх цөмийн полигонд идэвхтэй ажил өрнөж байна гэж Өмнөд Солонгосын засгийн газар баталж байгааг ВВС-гийн оросын мэдээллийн алба дамжуулж байна. Энэ мэдээлэлд Умардынхан цөмийн туршилт хийхэд бэлтгэж байгаа тухай дурджээ. “Умард Солонгос цөмийн гурван ч удаагийн туршилт хийгээд байгаа юм. Хамгийн сүүлд 2013 оны хоёрдугаар сард цөмийн зэвсэг туршсан нь Солонгосын хойгт байдлыг улам хурцатгасан юм. Үүний өмнө 2006, 2009 онд цөмийн зэвсэг туршсан юм” радио станцын мэдээнд дурдсан байна.