ОХУ-ын парламентын дллд танхимын гишүүн, “Нэгдмэл орос” намын  Евгений Федоров, Коммунист намын хоёр гишүүн, либерал ардчилсан намын Михаил Дегтярев нар Оросын ерөнхий прокурорын нэр дээр Зөвлөлт Холбоот улс задарсан үеийг шалгуулахаар шаардлага санал асуулга өгөхөөр бэлтгэжээ. Тэдний үзэж байгаагаар бол тухайн үед зөвлөлтийн иргэд нэгдсэн нэг улсаа авч үлдэх сонирхолтой байсаар байхад зөвлөлтийн удирдагчид хууль бус үйлдэл хийж улс орныг задрахад хүргэсэн гэнэ.
Прокурорын шалгалт хийх саналдаа тэд удирдах хүмүүс ялангуяа зөвлөлтийн сүүлийн удирдагч Михаил Горбачевт эрүүгийн хэрэг үүсгэх ёстой гэснийг “Известия” сонин бичжээ.
Энд 1991 оны арваннэгдүгээр сарын 4 –нд ЗХУ-ын ерөнхий прокурорын газар ЗХУ-ын ерөнхийлөгч Михаил Горбачевт эрүүгийн хэрэг үүсгэн шалгаж эхэлсэн ч маргааш нь энэ тогтоолоо өөрчилсөн байдаг гэдгийг дурдсан байна.  
Депутат Федоровын үзэж байгаагаар бол ЗХУ задарсан тухай асуудал сүүлийн 23 жилийн туршид хамгийн чухал, эмзэг сэдэв байсан, харин одоо украины хэрэг явдлаас үзэхэд сэргээн ярих цаг болсон гэнэ.

“Өнөөгийн өндөрлөгөөс 1991 оны үйл явдалд хуульзүйн задлан шинжилгээ зайлшгүй хийх ёстой. Бүх нийтийн санал асуулгыг хуурамчаар үйлдэж, төрийн байгууллагуудыг устгасан баримтууд ч байдаг. Энэ бүхнийг шалгаснаар  тухайн үеийн үйл явдлыг бидэнд ойлгуулж улмаар хуучин ЗХУ-ын бүрэлдхүүнд  байсан орнуудын үндэсний чөлөөлөх хөдөлгөөнд түлхэц өгнө. Горбачев хэн бэ, магадгүй мөрдөн байцаах явцад тэр АНУ-ын тагнуул байгаад улс орноо тараасан буруутай болох нь нотлогдох ч юм бил үү” гэж тэр хэлсэн байна. Тэд Горбачевыг Үндсэн хуульд байхгүй ЗХУ-ын Төрийн зөвлөл байгуулсныг буруутгасан байна. Чухамдаа энэ зөвлөл нь Балти орчмын гурван орныг тусгаар тогтнох тухай тогтоол гаргасан байдаг юм байна.
Ийм баримт бүхий гэмт хэргийн үйлдэл нь байсаар байхад Горбачев өнөө болтол эрүүгийн хэргээс зайлсхийж яваа гэжээ.

Харин Горбачев энэ бүхнийг ямар ч үндэслэлгүй, хэдэн депутат хувийн пиар хийх гэсэн оролдлого гэсэн байна. “Би хэнд саад болоод байгаа юм бол. Сүүлийн 20 хоногт намайг үхсэн гэсэн мэдээлэл хэд хэд гарлаа. Энэ хүмүүст хүн чанар гэж байна уу” гэж Горбачев тэмдэглэжээ.