Украины Улсын аюулаас хамгаалах албаны дарга Валерий Гелетей телевизийн “Интер” сувагт өгсөн ярилцлагадаа тус улсын ерөнхийлөгч асан Виктор Януковичийг эх ороноосоо хэрхэн зугтаасан тухай нууцыг дэлгэсэн байна.
Түүний хэлснээр бол Украины ард түмний төлөөлөл эрхэм ерөнхийлөгч Виктор Янукович эхлээд оросын цэргийнхэнд бууж өгсөн гэнэ. “Ерөнхийлөгч Виктор Янукович эхлээд оросын цэргийнхэнд бууж өгөөд Ростов-на-Донд хэвлэлийн бага хурал хийж олны өмнө гарахаа хүртэл ОХУ-ын нутагт хорионд байсан” гэж Гелеьей хэлжээ. Тэр бас Янукович эх орноосоо явах хүртлээ төрийн хамгаалалтаас татгалзаж өөрийнхөө хамгаалалтад ажиллаж байсан хүмүүсийн ажлаас нь чөлөөлсөн тушаал бичсэн гэсэн байна. Ерөнхийлөгч асан Виктор Януковичийн эх орноосоо зугтаасан хэргийг одоо Украины ерөнхий прокурорын газар шалгаж эхлээд байгаа гэж Улсыг Аюулаас хамгаалах газрын дарга хэлжээ.
Украины ерөнхийлөгч асан Виктор Янукович эх орноо орхин зугтаасан тухай хоёрдугаар сарын 22-нд орон нутгийн хэвлэлүүд мэдээлсэн юм. Ингэснээр түүнийг Украины ерөнхийлөгчийн албанаас чөлөөлсөн шийдвэрийг Украины парламентт Дээд Рада гаргаж ерөнхийлөгчийн үүрэг гүйцэтгэгчээр парламентын тэргүүн Александр Турчиновыг томилсон юм.
Украины ерөнхийлөгчийн сонгууль ирэх тавдугаар сарын 25-нд болно.