Их Британийн Кэмбрижийн гүн Уильямын гэр бүл Австрали, Шинэ Зеландад 21 хоногийн айлчлал хийхээр Веллингтон хотод хүрэлцэн ирлээ. Бямба гарагийн орой Лондонгоос ниссэн 11 хүний бүрэлдэхүүнтэй айлчлалын баг 28 цаг нисч Австралид түр буудалласны дараа Шинэ Зеландыг зорин иржээ. Веллингтонд цаг агаарын нөхцөл таагүй байсан учир гүнгийн айлчлал хойшлогдож ч магадгүй байжээ.
Австрали, Шинэ Зеландад гурван долоо хоног айлчлахдаа гүнгийн гэр бүл Веллингтон болон  Канберра, Сидней хотод байрлах юм байна. Тэд Веллингтонд ирснийхээ дараа албан ёсны уулзалт хөтөлбөргүйгээр нэг өдөр хагас амарч, аян замын алжаалаа тайлж байгаа аж. Гүнгийн авхай Кэтерин Шинэ Зеландад анх удаа ирж байгаа учир энэ удаагийн аялал, айлчлал нь маш сайхан болно хэмээн хүлээж ядаж байгаагаа хэлж байсан юм.