Пеньяны цөмийн болон пуужингийн хөтөлбөрийг шүүн хэлэлцэж байгаа НҮБ-ын байр суурийн хариуд шинэ төрлийн цөмийн зэвсэг туршина хэмээн БНАСАУ-ын эрх баригчид мэдэгдлээ. “Бид өөрийн орныхоо цөмийн хүчин чадлыг бэхжүүлэх зорилгоор шинэ төрлийн цөмийн зэвсэг туршихыг үгүйсгэхгүй” хэмээн БНАСАУ-ын Гадаад хэргийн яам мэдэгджээ.
Өмнөд Солонгосын Батлан хамгаалахын сайд Ким Гван Жин өнгөрсөн хоёрдугаар сард умардын Пунгери дахь цөмийн туршилтын талбайд тус улс дөрөв дэх удаагийн цөмийн туршилт хийх бэлтгэлээ хангаж  дуусгасан гэж мэдэгдэж байсан юм. БНАСАУ-ын Засгийн газар ч Өмнөд Солонгос-АНУ-ын цэргийн хамтарсан сургуулийн хариуд пуужин харваж хариу барина гэж мэдэгдсэн юм.
Тус улсад цөмийн технологитой ямар нэгэн үйл ажиллагаа явуулахыг НҮБ-ын Аюулгүйн зөвлөл хориглосоор байхад 2006 оноос хойш БНАСАУ гурван ч удаа цөмийн зэвсэг туршсан юм.
Гуравдугаар сарын 26-нд өглөө үүрээр БНАСАУ дунд тусгалын хоёр ч балласик пуужин харвасан нь 600 км нисээд Япон тэнгист унасан байна. Өмнөд Солонгос үүнийг нь НҮБ-ын Аюулгүйн зөвлөлийн хоригийг зөрчиж байна хэмээн шүүмжилсээр байгаа юм.
БНАСАУ  өөрийгөө цөмийн зэвсэгтэй гүрэн гэж 2005 онд зарласан юм. 2006, 2009, 2013 онд газар доор цөмийн зэвсэг туршсан нь олон улсын хамтйн нийгэмлэгийн зүгээс ихээхэн шүүмжлэл дагуулсан юм.