Украины Гадаад хэргийн яам Крымын тусгаар тогтнолыг ОХУ хүлээн зөвшөөрч, Крымын хойгийг Оросын бүрэлдхүүнд оруулах тухай хэлэлцээрт гарын үсэг зурсныг эсэргүүцэж Украинд Оросын хэргийг түр хамаарагч Андрей Воробьевт  эсэргүүцлийн нот бичиг гардуулсан байна.
“Украинд ОХУ-ын хэргийг түр хамаарагч Воробьевыг өнөөдөр ГХЯ-нд дуудаж эсэргүүцлийн нот бичиг гардууллаа” гэж яамны хэвлэлийн алба мэдээлсэн байна.
Украины Гадаад хэргийн яам ОХУ-ыг бусад улсын дотоод хэрэгт хөндлөнгөөс оролцож газар нутаг, хил хязгаарын бүрэн бүтэн байдлын баталгаа, олон улсын хэм хэмжээг зөрчиж байна гэж буруутгажээ. Үүнээс гадна Украины Загийн газар Крымын хойгийг ОХУ-ын бүрэлдхүүнд нэгтгэхийн эсрэг байгаагаа мэдэгдээд олон улсын эрхзүйн дагуу украин улс энэ талаар арга хэмжээ авах эрхтэй гэсэн байна.
Өнгөрсөн ням гарагт Крымд автоном эрхийн тухай бүх нийтийн санал асуулга болж нийт иргэдийн 96,77 хувь нь бүгд найрамдах улсаа ОХУ-ын бүрэлдхүүнд нэгтгэхийн төлөө санал өгсөн юм. Маргааш орой нь ОХУ-ын ерөнхийлөгч Владимир Путин “Крымыг нэгтгэх тухай” зарлигт гарын үсэг зурсан юм.