Сураггүй болоод бүтэн найм хонож байгаа Малайзын онгоцыг сүйрч осолдсон гэхээс илүүтэй барьцаалсан, нислэгийн чиглэлийг өөрчилсөн гэдэг хувилбар сүүлийн үед илүүтэй яригдаж байна. Одоо хууль хяналтын байгууллага онгоцны ахмад болон туслах нисгэгч хоёр дээр анхаарлаа төвлөрүүлэн шалгаж эхлээд байна. Тэдний олж тогтоосноор онгоцны ахмад, 53 настай Захари Ахмад Шах улс төрийн идэвхтэй нэгэн байсан бөгөөд нислэгт гарахын өмнөхөн сөрөг хүчний удирдагч Анвар Ибрахимын шүүх хуралд оролцож байжээ. Тэр шүүх хурлаас Анвар Ибрахимд таван жилийн хорих ял оноосон нь магадгүй онгоцны ахмадад нөлөөлж, нислэгт ямар нэгэн саад учруулах санаа сэдэл төрүүлсэн байж болох юм хэмээн сэжиглэж байгаа ч одоохондоо үүнийг батлах баримт нотолгоо хараахан олдоогүй байна.
Гэвч онгоцны холбоо барих хэрэгслийг нисгэгчид өөрсдөө зориуд унтраасан байх магадлалтай, дээр нь холбоо тасарснаас хойш чиглэлээ өөрчилж, агаарт олон цаг нисч байсан зэргээс нь үзвэл нислэгийн багийнхан өөрсдөө энэ хэрэгт буруутай болж таарч байгаа юм. Онгоц холбоо тасарснаас хойш долоон цаг нисэх шатахууны нөөцтэй байсан учир анх олон нийтийн төсөөлж байснаас огт өөр чигт бүр Төв Азийн нутаг дэвсгэрт ч байж магадгүй болоод байна.