Улсын Дээд шүүхийн Судалгааны төвөөс сүүлийн зургаан жилийн байдлаар шүүхээр шийдвэрлэсэн гэр бүлийн маргааны талаар судалгаа гаргажээ. Шүүхээр шийдвэрлэж байгаа гэр бүлийн маргаан 2007-2010 онд байнга өссөн бол 2011 оноос хойш буурсан үзүүлэлт гарсан байна.
Шүүхүүд Гэр бүлийн тухай хуулиар 2007 онд 3504, 2008 онд 3629, 2009 онд 4294, 2010 онд 4732, 2011 онд 4449, 2012 оны эхний хагас жилд 1833 хэрэг, нийт 22441 хэрэг шийдвэрлэжээ.
Гэр бүлийн маргааны 78.2 хувь нь буюу 17562 нь гэрлэлт цуцалсан хэрэг байна. Гэрлэлт цуцалсан хэрэг 2007 онд 2579 байсан бол 2011 онд 3642, 2012 оны эхний хагас жилд 1487 болж буурчээ. Үүнээс үзвэл 2007-2010 онд гэрлэлт цуцлалтын хэрэг тогтмол өссөн бол 2011 онд буурсан аж. Түүнчлэн 2012 оны эхний хагас жилийн байдлаар гэрлэлт цуцалсан хэрэг өмнөх оны мөн үетэй харьцуулахад 447 хэргээр буюу 23.1 хувиар буурсан байна.
