Хүүхдийн хөгжил, хамгааллын төвийн багш нар хэвлэл мэдээллийн байгууллагуудад нийтлэл нэвтрүүлэг бэлтгэхдээ Хүүхдийн эрхийг ямагт хүндлэн дээдлэхийг уриаллаа. Учир нь, тус төвийн бяцхан охины нэр хүндэд хэвлэлийнхэн ноцтой халдаж байна гэж үзжээ. Жилийн өмнө ээж нь охиноо хэрцгийгээр зодсон хэрэг олны дунд шуугиан тарьж байсан. Энэ тухай мэдээлэхдээ охины тухай хэт дэлгэрэнгүй мэдээлснээс болж өнөөдөр хичээлдээ явахдаа ч ичдэг болоод байгаа аж. Хэрэг гарснаас хойш охин дүүтэйгээ хамт Хүүхдийн хөгжил хамгааллын төвд ирсэн ба тус төвийн гомдлын дагуу ээж нь эмэгтэйчүүдийн хориход ял эдэлж байгаа аж. Цаашид охины нэр хүндийг хамгаалахын тулд хэвлэл мэдээллийн байгууллагуудад хандан түүний зураг, дүрс бичлэгийг олон нийтэд дэлгэхгүй байхыг уриаллаа. Үүний цаана хүүхдийн нэр хүнд хөндөгдөж, олон нийтийн дунд ороход хүндрэл гарч буйг анхаарна уу хэмээн Хүүхдийн хөгжил хамгааллын төвийн багш нар уриаллаа.
