УИХ-ын гишүүн, Тогтвортой хөгжлийн зорилгын дэд хорооны дарга Х.Булгантуяа өчигдөр АНУ-аас Монгол Улсад суугаа Элчин сайдын яамны Эдийн засаг, худалдааны хэлтсийн дарга Жон Ченгтэй уулзлаа.
Өнгөрсөн долоо хоногт УИХ-ын дарга Г.Занданшатар, УИХ-ын гишүүн Х.Булгантуяа болон албаны бусад хүмүүс АНУ-ын Элчин сайдын яамны Дэд тэргүүн Грегори Мэй тэргүүтэй төлөөлөгчдийг хүлээн авч уулзсан. Энэ үеэр Элчин сайдын яамны Эдийн засаг, худалдааны хэлтсийн дарга Жон Ченг оролцож, талууд Монгол Улс, Америкийн Нэгдсэн Улс хооронд байгуулагдсан Олон улсын худалдаа, хөрөнгө оруулалтын асуудлаар ил тод байдлыг хангах тухай хэлэлцээр (Ил тод байдлын хэлэлцээр)-ийн хэрэгжилтийн явц болон эрх зүйн орчны талаар санал солилцсон юм. Уг уулзалтаар УИХ-ын гишүүн Х.Булгантуяа тус хэлэлцээрийн хэрэгжилтийг дэмжиж ажиллах ажлын хэсгийн ахлагчаар ажиллахаар болсон билээ.
ЭСЯ-ны Эдийн засаг, худалдааны хэлтсийн дарга Жон Ченг УИХ-ын гишүүний саналыг дэмжиж байгаагаа илэрхийлэв. Тэрбээр, Монгол дахь Америкийн худалдааны танхимын гишүүдтэй уулзах үеэр хамтын ажиллагаа, техникийн туслалцаа болон бусад асуудлын талаарх саналаа уламжилна гэв. Талууд Ил тод байдлын хэлэлцээрийн хэрэгжилтийн өнөөгийн байдал, цаашид авах арга хэмжээ болон бусад асуудлын хүрээнд санал солилцов гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
