Нийслэлчүүдийн өдөр тутмын хэрэглээ болсон Атар талхыг үйлдвэрээс нь савлан худалдаанд гаргах шаардлагыг Нийслэлийн мэргэжлийн хяналтын газраас тавьсан тухай бид өмнө нь мэдээлж байсан. Энэ шаардлагын дагуу есдүгээр сарын 1-нээс буюу өнөөдрөөс эхлэн Атар талхыг савлагаатайгаар худалдаалж эхлэх байсан юм. Талхыг савлан худалдаалахын тулд бүтээгдэхүүний үнийг 210 төгрөгөөр нэмэх шаардлага гарч, үйлдвэрийн үнэ нь 840 төгрөг болж байгаа тухай Атар Өргөө, Талх Чихэр компаниуд мэдээлэл хийж байсан билээ.
Харин Шударга өрсөлдөөн хэрэглэгчийн төлөө газраас бүтээгдэхүүний өртгийн тооцоон дээр саналын зөрүүтэй байгаагаа мэдэгдсэн учир тодорхой хугацаагаар Атар талхыг савлагаагүйгээр хуучин үнээр нь буюу 630 төгрөгөөр худалдаанд гаргахаар болсон байна.
