Авто тээврийн газраас жолоочийн тээврийн хэрэгслийн ашиглалтын  дэвтэр гаргах гэж байгаа хэмээн өмнө нь мэдээлж байсан билээ. Нэлээн маргаан дагуулсан эл дэвтэр хэвлэгдэн авто тээврийн хэрэгслийн оношилгоонд хамрагдсан жолооч нарын гарт очжээ. Гэхдээ автомашины гэрчилгээ гэж байхад мөнгө хүүлэх гэсэн арга хэмээн нэлээн эсэргүүцэлтэй тулгарсан эл дэвтрийг хэдхэн жолооч аваад байгаа гэнэ. Энэ талаар тус газрын хэвлэл хариуцсан н.Цэндмаагаас тодруулахад “Одоогийн байдлаар хэдхэн жолооч сайн дурын үндсэн дээр авсан. Шууд тулгаж өгөх боломжгүй юм” гэв. Ямартай ч эл дэвтэр нь 2500 төгрөгийн үнэтэй бөгөөд ирэх он гэхэд бүх жолооч авсан байна хэмээн төлөвлөжээ.