Махны үнэ жинхэнэ утгаараа магнаг болж байна. Уг нь, наадмын дараа өдийд махны үнэ буудаг байсан бол өдгөө сард 100-200 төгрөгөөр нэмэгдэж байна хэмээн иргэд гомдоллож буй. Гэтэл нийслэлийн Статистикийн газрын долдугаар сарын гурван долоо долоо хоногт хийсэн судалгаагаар хонины ястай нэг кг мах дунджаар 7686, үхрийн ястай нь 8186 төгрөгийн үнэтэй байна. Энэ нь өмнөх долоо хоногтой харьцуулахад хониных 28, үхрийн цул махны үнэ 87 төгрөгөөр буурсан гэсэн байх юм. Тэр бүү хэл, хүнсний захуудад өмнөх долоо хоногтой харьцуулахад үхрийн мах кг нь 328 төгрөг, хонины 150 төгрөгөөр тус тус буурсан гэжээ. Долоо хоногийн махаа авахаар дэлгүүр, захаар эргэлдэх хэрэглэгч зөв хэлж байна уу эсвэл статистикийнхан өссөн үнийг нь бууруулаад байна уу. Мэдэх юм алга даа...