Энэ удаагийн парламент Х.Болорчулуун, Ц.Даваасүрэн, С.Ганбаатар гэсэн гурван бие даагч гишүүнтэй. Тэд УИХ-д бие даагчдын зөвлөл байгуулж ажиллана гэдгээ хэвлэлийн бага хурал зарлаж мэдэгдлээ.
УИХ-ын гишүүн Ц.Даваасүрэн “Бие даагч гишүүд ч өөрийн гэсэн мөрийн хөтөлбөртэйгээр сонгуульд оролцсон. Сонгогчид маань ч бидний энэ хөтөлбөрийг дэмжсэн. Тиймээс мөрийн хөтөлбөрөө хэрэгжүүлэх зайлшгүй шаардлагатай. УИХ-ын дарга сонгогдсоны дараа Бие даагчдын зөвлөлөө албан ёсоор байгуулахаар тохиролцлоо. АН 2004-2008 оны парламентад зөвлөл байгуулж ажилласан туршлага бий. Бид ч гэсэн энэ дагуу ажиллана гэж бодож байна. Бидний тогтоосон энэ практик дараа дараагийн бие даагч нарт ч гэсэн хэрэг болно.” гэв. Харин УИХ-ын гишүүн С.Ганбаатар “Энэ парламентад гурван бие даагч сонгогдсон. Цаад утгаараа УИХ-д 76 бие даагч байгаа. Гэтэл намчирхаж, намын эрх ашиг яриад төрийн ажлыг гацаагаад байх юм. Бид аливаа намын бүлэглэлээс хараат бус ажиллах болно” гэв. УИХ-ын гишүүх Х.Болорчулууны хувьд УИХ-ын бүтэц, яамдын тоог өөрчлөх гэж буйг хүлээн зөвшөөрөхгүй гэдгээ илэрхийлсэн юм.
Засгийн газарт орж ажиллах эсэхээ бие даагч нар зөвлөлдөж байж шийдвэрлэнэ гэдгээ ч энэ үеэр хэлсэн юм.