Парламент түүхэндээ анх удаа хамгийн олон буюу есөн эмэгтэй гишүүнтэй болмогцоо албан бус бүлэг байгуулахаар эвлэлдэн нэгдлээ. Бүсгүйчүүд хүүхэд, эрүүл мэндийн салбарт улс төр ярилгүйгээр гар нийлэн ажиллахаар сэтгэл шулууджээ. Ингээд эмэгтэйчүүдийн төлөө ажилладаг төрийн бус болон иргэний нийгмийн байгууллагуудтай уулзан, албан бус бүлэг байгуулах анхны алхмаа хийсэн юм. Харамсалтай нь, энэ өдөр “Шударга ёс” эвслийг төлөөлөн УИХ-д сууж буй Г.Уянга, Ц.Баянсэлэнгэ нар ирсэнгүй. Харин МАН-ын цорын ганц эмэгтэй гишүүн Д.Оюунхорол гадаадад яваа учраас ирж чадаагүй гэнэ. Тиймээс дээрх гурван гишүүнийг эвлэлдэн нэгдтэл албан бус бүлэг байгуулахаа түр хойшлуулаад байна.