Нийслэлийн шүүх өнөөдөр Увс аймгийн Засаг дарга Э.Цасчихэр, ИТХ-ын дарга Д.Батсайхан нарын давж заалдах гомдлыг хэлэлцэх байв. Гэвч илтгэгч шүүгчээр оролцох байсан  Б.Батцэрэн Олон улсын шүүгч нарын хуралд оролцохоор явсан учир шүүх хурал хоёр дахиа хойшиллоо.
Хан-Уул дүүргийн шүүх тэдэнд холбогдох хэргийг хоёр сарын өмнө хэлэлцэж, албан тушаалаа урвуулан ашиглаж, төсвийн хөрөнгийг завшсан хэмээн буруутган Э.Цасчихэрт гурван жил, Д.Батсайханд хоёр жил хорих ял оноож, тус бүрийнх нь төрийн албанд ажиллах эрхийг хоёр жилээр хасах шийдвэр гаргасан юм. Гэвч тэд эл шийтгэлийг хүлээн зөвшөөрөхгүй давж заалдах шатны шүүхэд хандсан нь энэ.