Хиллари Клинтон 2016 оны арваннэгдүгээр сард болох АНУ-ын Ерөнхийлөгчийн сонгуульд оролцох тухайгаа ирэх дөрөвдүгээр сард зарлана гэж The Wall Street Journal хэвлэл мэдээллээ.

“Хиллари Клинтон ерөнхийлөгчийн сонгуулийн сунгаанд оролцох талаараа тун удахгүй дөрөвдүгээр сард зарлана гэж  ойрын хамтрагчид нь Ардчилсан намын ивээн тэтгэгчдэд мэдэгдсэн байна. Ингэснээрээ тэрээр сонгуулийн кампанийнхаа хөрөнгийг хуримтлуулах ажлаа эхлэх юм байна” гэж хэвлэлд бичсэн байна.

Хэвлэлийн мэдээлснээр бол Клинтоны сонгуулийн штаб нэг тэрбумаас доошгүй доллар хуримтлуулахаар төлөвлөж байгаа юм байна гэжээ. “Хэрэв Клинтон сонгуульд оролцох тухайгаа зунаас өмнө амжиж зарлахгүй бол шаардлагатай хөрөнгө цуглуулж амжихгүй хэмээн зарим хандивлагч сэтгэл зовниж байгаа юм” хэмээн хэвлэлд тэмдэглэжээ. Сонин Барак Обама 2012 оны сонгуульд оролцохдоо 716 сая доллар цуглуулсныг бас сануулсан байна.