Хятадын армийн жин ихтэй албан хаагчид үүнээс хойш цол ахих боломжгүй болж байгаа талаар БНХАУ-ын Батлан хамгаалах яам мэдээлснийг хэвлэлүүд дамжууллаа.
Цэргийн албан хаагчдыг цол ахиулах эсэхийг биеийн жингээс нь хамаарч байх талаарх төлөвлөгөөг Хятадын ардын чөлөөлөх армийн Жанжин штаб баталсан байна. Цэргийн албан хаагчийн жин нь түүний цэргийн бэлтгэлийн нэг үзүүлэлт гэж үзсэнээс ийм төлөвлөгөө гаргажээ.

“Энэ төлөвлөгөөгөө ёсоор бол цэргийн албан хаагчдын биеийн жин нь түүний биеийн тамир, байлдааны бэлтгэлийн нэг үзүүлэлт гэж үзэж ийм бэлтгэлээ сайн хийсэн хүн хэт таргалахгүй учраас цол ахиулж болно гэж үзэж байна” хэмээн эл баримт бичигт дурдсан байна.
Цэргийн шинжээчийн хэлснээр цэргийн албан хаагчдын биеийн жин нь зөвхөн дайчдын имиж төдийгүй армийн байлдааны бэлтгэл, дайтах чадварт нөлөөлнө гэнэ.

Баримт бичигт цэргийн албан хаагчдын жин ямар байхыг тодорхой заагаагүй байна. Гэхдээ цэрэг, цэргийн академийн сонсогч, захиргааны албан хаагчдын биеийн жинг нарийвчлан заах гэнэ.
2011 онд бас ОХУ-ын Дотоод хэргийн сайд Рашид Нургалиев салбартаа ажиллагсдаас  “бүдүүн, өөхлөг” албан хаагчдыг атестатчилахгүй гэж урьдчилан анхааруулж байсан юм.