Украины Львов муж дахь  цэргийн бэлтгэлийн баазад 68 настай тэтгэврийн эмээ эрчүүдтэй мөр зэрэгцэн цэргийн сургуулилт хийж байгааг фейсбүүкт зургийг нь нийтэлжээ. Автомат буугаар зэвсэглэн эрчүүдээс дутахгүйгээр байлдааны бэлтгэл хийдэг эмээд “Дайчин  эмээ” гэсэн нэр өгчээ.

“Нэгдүгээр сарын 10-11-нд Львов мужийн Жидачов хотод цэргийн бэлтгэлийн сургуулилт боллоо. Энэ үеэр галын бэлтгэл, тагнуул, холбоо, эрэн хайх, эмнэлгийн тусламж, минээс сэргийлэх, газар орны байрлал тогтоох зэрэг дасгал үйлдсэн. Энэ сургуулилтад 68 настай Катерина Апполинаровна оролцсон” гэж Львов мужийн захиргааны хэвлэлийн алба мэдээлснийг хэвлэлүүд мэдээлсэн байна.

Сайн дурын ажилтан  Наталья Ищенко өөрийнхөө фейсбүүкт бас “68 настай Катерина яг бусдын адил гүйж, мөлхөж, буудаж, жагсч, тагнуулд яван, АКМ буу задалж угсран, бууны дайз цэнэглэж, байлдааны төрөл бүрийн бэлтгэлийг бусдаас дутахгүй хийж байсан” гэж бичсэн байна.
Эмээ бас энэ сургуулилтад оролцох гэж таван км-ийн зайд байх суурингаас явган алхаж ирсэн гэнэ.