БНХАУ-ын ӨМӨЗО-ны шүүх 18 жилийн өмнө хилсээр шийтгүүлэн цаазлуулсан залуугийн гэр бүлд 330 мянган долларын нөхөн төлбөр олгох шийдвэр гаргасан байна.
Хөгжилт гэдэг залууг аллагад буруугүй болохыг нь арванхоёрдугаар сарын 15-нд  тогтоосон юм.
Хөгжилт 1996 оны дөрөвдүгээр сард танилтайгаа хамт явж байгаад Хөххотын нийтийн бие засах газраас нэгэн эмэгтэйн цогцос олоод  цагдаад мэдэгджээ. Харин тавдугаар сард нь түүнийг хүн алсан хэрэгт буруутган цаазаар авах ял оноож зургадугаар сард гүйцэтгэсэн байна.
Гэтэл 2005 онд цагдаагийнхан тэр эмэгтэйг алсан хэрэгт сэжиглэн нэгэн эрэгтэйг саатуулснаар хэрэг сөхөгдөж 2014 оны арваннэгдүгээр сард Хөгжилтийн хэргийг эргэн хянажээ.
Энэ бол Хятадад гарч байгаа анхны имй тохиолдол биш. Гуандан мужид Сюй Хуэю гэдэг залууг аллагад буруутган цаазаар авах ял оноосон ч 16 жилийг шоронд өнгөрүүлсний нь дараа буруугүй болохыг нь нотолж шүүхийн алдааны төлөө 250 мянган долларын нөхөн төлбөр өгч байсан  юм.