ОХУ-д рублийн ханш унаж эхэлснээр орост ажиллаж байсан хөдөлмөрийн цагаачид нутаг буцаж эхэлсэн байна. Үүний зэрэгцээ орост хөдөлмөрлөж байгаа гадаад иргэдээс ирэх оны нэгдүгээр сараас эхлэн орос хэлний төлбөртей шалгалт авах болсон нь ч бас нөлөөлж байгаа гэнэ.

“Цагаачид Оросыг орхиж эхэлж байна. Өнөөдрийн байдлаар цагаач ажиллагсдын 25 хувь нь шинэ жилийн баярын дараагаар нутаг буцах юм уу, өөр улсууд руу явахаар төлөвлөж байна” гэж Орост цагаачлагчдын холбооны тэргүүн Мухаммед Амин баасан гарагт “Интерфакс” агентлагт мэдэгджээ.
Түүнийхээр бол үүнд хоёр зүйл нөлөөлж байгаа гэнэ. Рублийн ханш суларч байгаа болон, дараа оны эхнээс хөдөлмөр эрхлэгч цагаачдаас орос хэл, оросын түүх, хууль зүйн мэдлэгийн шалгалт авах болсон явдал гэж тэр онцолжээ.

“Тажикийн хөдөлмөрийн цагаачид” байгууллагын тэргүүн Каромат Шарипов ч бас Тажикстаны олон ажилчин Оросоос явах гэж байгааг баталсан байна. “Асуудал ганцхан рублийн ханштай ч холбоотой биш. 2015 оны нэгдүгээр сарын 1-нээс шалтгалт авах шаардлага тавьж байгаа нь олон хүнд дарамт болж байна” гэж Шарипов хэлжээ.
Цагаачдаас ийм шалгалт авахад 30 мянган рублийн төлбөр нэхэж байгаа нь рублийн ханш унаж байгаа ийм үед  ажил хөдөлмөр эрхэлж амь зуулгаа залгаж байгаа олон хүнддарамт болж эхэллээ гэсэн байна. Тажикстаны олон хүн гадаад оронд хөдөлмөр эрхлэхийн тулд эх орондоо зээл тавьж ирсэн гэж тэр онцолсон байна.