Мобиком болон Юнителийн үүрэн телефон хэрэглэгч УИХ-ын гишүүдийн утасны дугаарыг ашиглан Газрын тухай хууль, Bank of China болон Төмөр замын царигын асуудлаар олон нийтэд ташаа мэдээлэл түгээсэн хэрэг гарсан.

Үүнтэй холбогдуулан “Мобиком” корпорацийн Гүйцэтгэх захирал Дэвид Холлидэй, дэд захирал М.Энхсайхан нар тайлбар хийлээ. Тус корпорацийн Гүйцэтгэх захирал Дэвид Холлидэй, “Бид бусдын утасны дугаарыг ашиглаж мессеж явуулсан энэ тохиолдлын цаана хоёр улсын операторын сүлжээ ашигласныг тогтоогоод байна. Өөрөөр хэлбэл, Румын, Мальта гэсэн хоёр улсын үүрэн холбооны оператороос Монголын хэрэглэгдийн дугаарыг ашиглаж мессеж илгээсэн байна. Ингэхдээ нийт 20 хэрэглэгчийн дугаарыг ашигласан байна. Харин энэ 20 хэрэглэгчээс хичнээн хүнд мессеж явуулсан нь хараахан тодроогүй. Хүмүүсийн ойлгож байгаа шиг энэ тохиолдол бол ”Мобиком” хакердуулсан, мэдээлэл алдагдсан зүйл болоогүй. Маш энгийнээр хэлэхэд, хулгай, залилан хийж байгаатай адил үйл явдал гэж ойлгож болно. “Мобиком”-ын гарсан алдааг тодорхой болгохоор Үндэсний аюулгүй байдлын зөвлөл болон бусад үүрэн телефоны оператор компаниудтай хамтран ажиллаж байна. Одоогийн байдлаар дээрх хоёр улсын үүрэн телефоны операторууд руу хандаж, манай улсын үүрэн операторуудад ирсэн, хууль бус мессежийг хязгаарлах чиглэлээр шуурхай арга хэмжээ авч байна” гэлээ.