Луйварчдад их хэмжээний мөн­гө хулгайлах боломж гар­гасан “цоорхой” банкны автоматуудын прог­рамм хангамжид байгааг интернэт аюулгүй байдлыг хангах чиглэлээр ажилладаг "Касперскийн лаборатори" компанийн мэргэжилтнүүд илрүүлсэн байна. Үүнтэй холбоотойгоор интерполоос луйварчид энэ аргаар банк­ны автоматаас мөнгө ава­хыг оролдсон Европ, Латин Америк, Азийн банкуудын аюулгүй албад руу ан­хаа­руулга явуулан өргөн хүрээтэй мөрдөн байцаалт эхлүүлжээ.

Луйварчид энэ аргаар мөнгө хулгайлахын өмнө банкны автоматыг вирус бүхий CD уншуулан халдварлуулаад дараа нь дэлгэцэн дээр гарах тоон дарааллыг оруулаад нэг дор  40 мөнгөн дэвсгэрт авдаг аж.
Тодруулбал, “Тюпкин” гэж нэрлэгдсэн хулгайн программ суулгасны дараа тусгай хүн очиж шаардлагатай тоон кодыг нэг удаагийн нууц үгийн хамт хийснээр бэлэн мөнгө авдаг. Тоон код оруулж байгаа хүн төлөвлөснөөс илүү хэмжээний мөнгө авч  банкны аюулгүй албаны анхаарлыг татахаас сэргийлэх үүднээс давхар нэг удаагийн нууц үг өгдөг аж.

Энэхүү аргаар луйвардсан мөнгө жирийн хэрэглэгчдийн данснаас гардаггүй харин банкны автоматад хадгалагдаж байсан мөнгийг гадагшлуулдаг онцлогтой .
“Касперскийн лабора­тори"-ийн ажилтан Висент Диаз “Сүүлийн хэдэн жил хэрэглэгчдийн картын өгөгдлүүдийг нууцаар уншин хулгайлдаг төхөөрөмж, вирус ашиглан банкны автоматуудаас мөнгө авах гэсэн оролдлого эрс нэмэгдэж байгааг ажигласан. Гэтэл одоо кибер гэмт хэрэгтнүүд санхүүгийн институтуудэд шууд заналхийлдэг боллоо” гэжээ.

Энэ болон үүнтэй төстэй гэмт хэргээс сэргийлэхийн тулд банкны автоматуудын үйлдлийн системийг тогтмол шинэчилж байхыг сануулав. “Касперскийн лаборатори"-оос гаргасан мэдэгдэлд “Хэрэв үйлдвэрлэгчид ба банкууд банкны автоматын аюулгүй байдлыг илүү боловсронгуй системтэй болгох талаар анхаарал тавихгүй бол цаашид ийм хэрэг олон гарна” гэжээ.  Банкууд санхүү эсвэл зохион байгуулалтын шалтгаанаар банкны автоматын үйлдлийн болон хамгаалалтын системээ шинэчлэх гэж яардаггүй нийтлэг хандлагатай.
Үүнээс өмнө буюу энэ оны эхээр банкны автомат руу “SMS“ явуулаад мөнгө авдаг “Ploutus” нэртэй луйврын программ илэрч банкуудыг сандаргаж байсан юм.