Монакогийн хунтайж Альбертын гэргий Шарлен хэдэн сарын дараа амаржина. Түүнийг хэвлийдээ хоёр ихэр хүүхэд тээж байгаа гэсэн баттай бус мэдээлэл тархаад байгаа. Гэхдээ 36 настай гүнжийг ихэр хүүхэд тээж байгаа гэсэн мэдээллийг маш ойрын эх сурвалж нь анх ам алдсан юм.
Хэрэв гүнжээс хоёр ихэр хүүхэд төрвөл хэн нь хаан ширээ залгамжлах бол гэдэг олны анхаарлыг их татаж байна. Ер нь бол хамгийн эхлээд төрсөн хүүхдэд нь хаан ширээ залгамжлах эрх оногдоно гэж байгаа ч тэр нь охин байвал яах вэ гэсэн асуулт ч давхар гарч ирж байгаа юм. Ямартай ч Монакогийн хаан ширээг залгамжлах үр удам бүр хоёроороо мэндлэх нь.
50 гартлаа хүнтэй гэрлээгүй хунтайж Альбертыг үлдсэн амьдралдаа хүнтэй суухгүй байж магадгүй хэмээн эмээсэн эцэг нь амьд сэрүүндээ хуулиа өөрчилж, хэрэв түүнийг хууль ёсоор гэрлэж, хүүхэдтэй болохгүй бол эгч, дүү нар нь хаан ширээ залгамжилж болно хэмээн хуульчилсан юм. Харин тийм явдал болсонгүй. Хунтайж Альберт олон жил болзсон Өмнөд Африкийн үзэсгэлэнт тамирчин Шарлентай гурван жилийн өмнө гэрлэсэн билээ.