Нефть импортлогч компаниудаас “Шунхлай” компани борлуулж байгаа шатахууныхаа үнийг тус бүрт нь 50 төгрөгөөр нэмжээ. Өчигдөр 18 цагаас эхэлж нэмсэн гэнэ. Харин бусад шатахуун түгээх станциуд нэмсэн эсэхийг судлахаар 32-ын тойрог, Баянбүрд орчимд байрлах ШТС-иудаар орлоо. 32-ын тойргийн замын уулзварын баруун талд “Шунхлай” компанийн ШТС байдаг аж. Тэд үнээ өчигдөр орой нэм гэсэн үүрэг өгсний дагуу нэмсэн гэж байна. Тэгвэл эл ШТС-ийн эсрэг талд байрлах М-ойл компанийнхан хараахан нэмээгүй байна. Үнээ нэмэх эсэхийг тодруулахад, “Бидэнд хараахан мэдэгдээгүй байна” гэснээс өөр хариу өгсөнгүй. Тэдний хувьд Монгол Улсын нефтийн салбарын хувь заяа ямар байгаа тухай мэдээлэл ч байхгүй бололтой.
Ийн наашаа гуравдугаар сургуулийн уулзвар чиглэж замд байрлах “Содмонгол”-ын ШТС-ын үнийн самбарыг харвал хэвэндээ байна. Мөн Баянбүрд автобусны буудлын дэргэд байрлах ШТС ч үнээ хараахан нэмээгүй байна.
Нэг үхрийн эвэр доргивол мянган үхрийн эвэр гэж “Шунхлай” компани үнээ нэмлээ гээд бусад  нь ч ялгаагүй нэмэх нь дамжиггүй. Үүнийг дагаад өргөн хэрэглээний бараа бүтээгдэхүүний үнэ нэмэгдэх биз. Инфляцийг нэг оронтой тоонд оруулна гэсэн амлалт үүгээр цэглэгдэх вий дээ.