Энэтхэгийн Нью-Дели хотод таван эр автобусанд залуу эмэгтэйг хүчирхийлж, амь насанд нь хүрсэн жигшүүрт хэрэг гарч, олныг цочроосон. Энэ хэрэгт холбогдсон сэжигтнүүдийг бүгдийг нь шоронд хорьж байсан ч нэг нь амиа хорлож нас барсан байна. Цагдаагийн газрын мэдэгдсэнээр бол автобусны жолооч шоронгийн камертаа амиа егүүтгэсэн байдалтай олджээ. Харин сэжигтний гэр бүлийнхэн үүнийг амиа хорлосон тохиолдол биш, гадны нөлөөтэй нас барсан гэж гэж үзэж байгаа аж. Энэ хэрэг Энэтхэг төдийгүй дэлхий даяар шуугиан тарьж, хэрэгтэн этгээдүүдийг бараг хүн бүр үзэн ядаж байгаагаас шоронд тэднийг дээрэлхэх, дэглэх явдал маш их гарч байсан гэнэ. Сэжигтний гэр бүлийнхний хэлснээр түүнийг бусад хоригдол нь дэглэж, зодож заримдаа бүр хүчирхийлдэг байсан бөгөөд гартаа хүнд бэртэлтэй байсан учраас амиа егүүтгэж чадахааргүй байсан гэлцэж байна. Ямартай ч, олныг цочроосон гэмт хэргийн яллагдагчдын нэг шүүхээр гэм буруугаа тогтоолгож ялаа эдлэхээс өмнө хорвоог орхилоо. Харин үлдсэн хэрэгтнүүдэд ялын дээд хэмжээ заавал оноох хэрэгтэй гэж хохирогчийн гэр бүлийнхэн мэдэгджээ.
