НҮБ-ын Аюулгүйн зөвлөлийн төсөөлж байгаагаар Сирид болж байгаа иргэний дайнаас дүрвэж гарагсдын тоо энэ жил гурван саяд хүрэх бололтой. Зөвхөн сүүлийн гурван сард гэхэд л тус улсаас 400 мянга гаруй хүн дүрвэн гарчээ. НҮБ-ын дүрвэгсдийн асуудал эрхэлсэн дээд комиссар Антониу Гутерриш өчигдөр Туркт айлчлах үедээ хэлснээр бол дүрвэгсдийн тоо улам нэмэгдэх хандлагатай байгаа гэнэ.
2013 оны эхний саруудад гарч явсан 400 мянган хүнийг оруулаад нийт дүрвэгсдийн тоо нэг саяд хүрч байна. Тэдний 650 мянга нь Ливан, Иорданд орогнож байгаа бол бусад нь Турк, Ирак болон Хойд Африкийн орнуудад амь зогоож байна.
Сирийн Ерөнхийлөгч Башар Асадыг эсэргүүцсэн зэвсэгт бослого 2011 оны гуравдугаар сард эхэлж энэ нь иргэний дайн болж өргөжөөд байгаа юм. Энэ дайны хөлд нийтдээ 70 орчим мянган хүн амь үрэгдсэн гэж НҮБ тооцоолжээ. Асуудлыг энхийн аргаар зохицуулах гэж НҮБ чармайлт гаргасаар байгаа ч амжилт олохгүй үргэлжилж байна.