АНУ-ын Тээврийн аюулгүй байдлын газраас агаарын тээврийн журмаа бага зэрэг өөрчилж, халаасны жижиг тонгорог,  хутгыг нислэгт авч явахыг зөвшөөрдөг болжээ. 2001 оны есдүгээр сарын 11-ний халдлагаас хойш онгоцонд ийм жижиг хутга ч авч орохыг хориглодог болоод байсан. Тэгвэл ирэх сарын 25-наас эхлэн өргөнөөрөө зургаан см-ээс нарийхан, халаасны жижиг хутга, тонгоргийг онгоцонд авч орохыг зөвшөөрөх юм байна. Харин цаас зүсэгч, сахлын хутга, янз бүрийн иртэй хутгыг хориглосон хэвээр байгаа аж. Мөн дээрх өөрчлөлтөөр билльярдны цохиур, цанын таяг, хоккейн цохиурыг онгоцонд авч орохыг зөвшөөрчээ. Энэхүү өөрчлөлт зорчигчид болоод нисэх багийн гишүүдийг эрсдэлд оруулж мэдэх аюултай алхам боллоо хэмээн онгоцны үйлчлэгчид дургүйцэж байгаа гэнэ.