Венесуэлийн ерөнхийлөгч Уго Чавесийн амь ахуйдаа өөрийнхөө залгамжлагч гэж зарласан дэд ерөнхийлөгч Николас Мадурод тус улсын армийн командлал үнэнч байж дэмжихээ илэрхийлсэн байна. Венесуэлийн Батлан хамгаалахын сайд Дьего Молеро “Венесуэлийн арми улс орныхоо нэгдмэл байдал, үндсэн хуулиа сахин хамгаалахад бэлэн байна. Уго Чавесийн өөрийн залгамжлагч гэж нэрлэсэн дэд ерөнхийлөгч Николас Мадурог дэмжиж байна” гэж мэдэгджээ.
Венесуэлийн дэд ерөнхийлөгч Николас Мадуро Морос 1962 онд төрсөн. 2006 оноос Гадаад хэргийн сайдаар ажиллаж байгаад 2012 оны аравдугаар сард дэд ерөнхийлөгч, Гадаад харилцааны сайдаар ажилласан.
1970-80 онд жолооч, Каракасын метронд ажиллаж, үйлдвэрчний эвлэлийн албан ёсны бус гишүүн байсан. Тэрээр “Тавдахь бүгд найрамдах улс” хөдөлгөөнийг санаачлагчдын нэг. 1998 оны ерөнхийлөгчийн сонгуулийн кампани болон Уго Чавесийг суллахад чухал үүрэг гүйцэтгэсэн гэдэг. Ингээд 1998 онд венесуэлийн палатын депутат, 1999 онд Үндэсний хуралд сонгогдсон. Тэрээр дээд боловсролгүй ч гэсэн Үндэсний хурлын даргаар сонгогдож байлаа.
