Афганистанд алба хааж байгаад 1980 онд сураггүй алга болсон гэж байсан зөвлөлтийн цэргийн албан хаагч Бахретдин Хакимов тус улсын Герат мужид амьдарч байсныг олсон байна. Самаркандад төрсөн Хакимов зөвлөлтийн цэргийн мотобуудлагын 101 дүгээр хороонд алба хааж байгаад 1980 оны намар тулалдааны үеэр хүнд шархадсаныг нутгийн иргэд олж аварсан юм байна. Тэд түүнийг ардын эмчилгээгээр эмчилж эдгээгээд Шейх Абдулла гэсэн нэр өгчээ. Тэгээд тэр тэнд бас амаргүй хувь заяа туулсан байна. Хакимов афган бүсгүйтэй гэрлэсэн ч хэдэн жилийн дараа эхнэр нь нас барж хүүхэдгүй ганцаар хоцорчээ. Одоо тэрээр нэгэн цагт өөрийг нь эмчилж эдгээсэн шиг ардын эмчилгээ хийж, хагас нүүдэлчин байдлаар амьдардаг байна.

Оросын интернационалч цэргийн алба хаагчдын холбооноос түүний сургийг гаргаж уулзахаар хайхад сүүлийн нэг жилд гурван ч удаа тэр зугтаагаад уулзахгүй байжээ. Одоо тэр оросоор ойлгодог ч муу ярьдаг, анх гар, мөрөндөө шархадсан ч мэдрэлд нь бас нөлөөлсөн бололтой. Гэхдээ тэр црээгт татагдахын өмнө хана амьдарч байсан, эцэг эхийнхээ нэрийг зөв хэлж, хэрэв амьд сэрүүн байгаад дургүйцэхгүй бол уулзах юмсан гэж ярьсан байна.

Хакимовт афганд алба хааж байгаад тэр Герат мужид сураггүй алга болсон зөвлөлтийн хоёр ч цэргийн албан хаагчийн зургийг үзүүлэхэд нэгтэй нь бүр уулзаж байсан гэсэн байна. Энэ нь сураггүй алга болсон цэрэг дайчдаас нэгийг нь ч гэсэн олох найдлага төрүүлж байгаа юм.

Өнөөдрийн байдлаар афганд алба хааж байгаад сураггүй алга болсон зөвлөлтийн цэргийн албан хаагчдын жагсаалтад 264 хүн байдаг юм байна. Тэдний тэн хагас нь орос хүн байдаг байна. Афганаас зөвлөлтийн цэрэг гарч эхлэхэд энэ тоо 300 гаруй байсан ч эхний 10 жилд 29-ийг нь олж 22-ыг нь эх оронд нь буцаан авчирсан бол 7 нь Афганистанд амьдрахаар үлдсэн юм байна.