Хөөмэй, язгуур урлагийн “Дөрвөн бэрх” чуулга энэ сарын 10-наас Франц улсад аялан тоглолт хийхээр болжээ. Чуулгын бүрэлдэхүүнд Урлагийн гавьяат зүтгэлтэн, хөөмэйч Д.Цэрэндаваа, МУГЖ Н.Сэнгэдорж, СУИС-ийн багш Б.Одсүрэн, Н.Ганзориг нар багтдаг юм. Аялан тоглолтоороо хөөмэй, уртын болон богино дууг европын иргэдэд сурталчилна. Ингэхдээ морин хуур, товшуур, цуур хөгжимтэй хослуулан тоглох аж. Түүнчлэн “Хөөмийн эзэд” хэмээх баримтат киног толилуулж, сонирхсон хүмүүст хөөмэй зааж өгөхөөр замдаа гарчээ.
Тус чуулгыг угсаатны хөгжим судлаач, францын иргэн Жоанни Кюртедын санаачилгаар байгуулж байжээ. Тиймээс тоглолт хийх орноороо францыг сонгосон бөгөөд Рэннэс, Парис, Лион, Лилль, Лэ Манс хотоор тоглоно. Уран бүтээлчид ирэх сард эх нутагтаа эргэн ирэх юм.
