Энэ жилийн урлаг соёлын хамгийн дуулиантай явдлуудын нэг бол яах аргагүй К-поп-ын төлөөлөл болсон “Gangnam Style” дуу дэлхий нийтийг байлдан дагуулсан явдал байлаа. Ердөө өнгөрсөн долдугаар сард Youtube-д тавигдсан энэ дууны видео клипийг өдгөө нэг тэрбум гаруй удаа үзэж, рекорд тогтоогоод байна. Холливудын оддоос эхлээд Британийн арми, Тайландын тэнгисийн цэрэг, Филиппиний шоронгийн хоригдлуудын дунд хүртэл хит болж, алдарт морины бүжгийг нь хүн бүр дагаж дуурайж байгаа нь “Ганнам Стайл” дэлхийн өнцөг булан бүрт хэр хүчтэй тархаж буйг бэлхнээ харуулж байгаа юм.
“Google” тооцооллоор бол өдөрт 7-10 сая удаа энэхүү дууны клипийг үзэж байгаа гэсэн статистик гарчээ. Үзэгчид зөвхөн Ганнам Стайлыг үзэж сонирхоод барахгүй өөр өөрсдийн Ганнам Стайлаа бүтээн, интернэтээр цацаж байгаа нь энэ дууны амжилтыг улам бататгаж байна хэмээн энэ салбарын мэргэжилтнүүд хэлж байна.
Youtube-ийн рекордыг эвдсэнээс гадна хамгийн олон “Like” цуглуулсан клип гэдгээрээ Гиннесийн дээд амжилт тогтоогоод байгаа энэ дуу уран бүтээлчээ аль хэдийнэ ам.долларын саятан болгочихоод байгаа юм. Дуучин PSY зөвхөн энэ дуугаараа 7,6 сая ам.долларын ашиг олсон гэх бөгөөд саяхан Америкийн одод амьдардаг Беверли Хиллс орчимд 1,2 сая ам.доллараар байр худалдан авсан юм.