УИХ дахь Ардчилсан намын бүлгийн ахлагч, УИХ-ын гишүүн Д.Эрдэнэбат Хөвсгөл аймагт ажиллаж байгаа билээ. Тэрээр тус аймгийн Цагаан-Уул, Бүрэнтогтох, Мөрөн, Тариалан сумын иргэдтэй уулзаж орон нутгийн иргэд нутаг орондоо юу хэрэгтэй, ямар хөрөнгө оруулалт илүү шаардлагатай байгааг өөрсдөө хэлэлцээд, түүнийг нь ИТХ хэлэлцээд, шийдвэрлэдэг байх зарчимд шилжинэ гэдгийг хэлсэн байна. Мөн сүүлийн үед асуудал болоод буй  шатахууны асуудлаар иргэдийн санал бодлыг сонсчээ. Аймгийн хэмжээнд А80 бензин 20 гаруй хоногийн нөөцтэй байгаа аж.  Харин дизель түлшний нөөцийн хувьд нийт 16 тонн орчим  байгаа гэнэ. Үүнийг зөвхөн албан хэрэгцээ, аймгийн онцгой байдлын хэлтсийн үйл ажиллагаанд ашиглаж байгаа юм байна. “Үндсэндээ дизель түлшний нөөц дууссан” гэдгийг аймгийн Засаг даргын орлогч М.Очирхуяг хэлсэн байна.  Түүнчлэн тус аймгийн хувьд сүүлийн хэдэн өдөр орсон цасны улмаас өвөлжилт хүндрэх хандлагатай болоод байгаа аж. УИХ-ын гишүүн өнөөдөр Булган аймгийн Хутаг-Өндөр, Булган суманд ажиллах юм байна.