“ТВ-5” телевиз өнгөрсөн жилээс “Ододтой бүжиглэе” шоу зохион байгуулж эхэлсэн. Харин тун удахгүй болох “Ододтой бүжиглэе-3” шоу зохион байгуулахаар болж оролцогчид аль хэдий нь тодорчээ. Уламжлал ёсоор найман оролцогч мэргэжлээ солин бүжгийн спортоор өрсөлдөж 13 төрлийн бүжгээр авхаалж самбаагаа сорих юм байна.
Энэ удаагийн шоунд ДБЭТ-ын гоцлол дуучин Ө.Уянга, циркийн уран нугаралт, тэнцвэрийн жүжигчин Э.Лхагва-Очир, УДЭТ-ын жүжигчин Г.Отгонцэцэг, “Anemone” хамтлагийн дуучин Жанна буюу Б.Баяржаргал, хошин урлагийн “Захиалгат инээд” хамтлагийн жүжигчин Мөөжиг буюу Ө.Мөнх-Эрдэнэ, “Овжин охид” киноны Сампилын дүрээр олонд танигдсан “MACK” продакшны жүжигчин Б.Ганзориг, “Азийн модель” агентлагийн захирал, мисс Ч.Содтуяа, зохиолын дуучдын дунд “Аавыгаа санахаараа” дуугаараа алдаршсан П.Идэржавхлан нар авьяас билэг, авхаалж самбаагаа харуулахаар хослон бүжих бүжигчдийнхээ хамтаар “дуэльд” дуудагджээ. Харин энэ удаад дуучин Р.Номин-Эрдэнийг оролцох санал тавьсан ч татгалзсан хариу өгчээ.
