Монгол улс орос ах нарын нөлөөнд 70 жил социализм, коммунизмаар замнаж байсан түүхийн  хамгийн тод жишээ болон үлдсэн Лениний хөшөөнд өнөөдөр баяртай гэж хэлэх нь. Өмнөх нийгмийн өнгө аясыг өнөөгийн ардчилсан нийгэмд илэрхийлээд 20 жил үдсэний эцэст В.И.Ленин багшийн хөшөөг  өнөөдөр буулгаад, хаашаа ч юм авч явах гэнэ.
58 жилийн өмнө хоёр улсын найрамдалт харилцааны бэлгэдэл болгон босгосон уг хөшөөг Нийслэлийн Иргэдийн төлөөлөгчдийн хурлсын шийдвэрээр буулгахаар болсон юм. Уг шийдвэрийн дагуу өнөөдөр хөшөөг буулгаж байгаа бөгөөд удахгүй дуудлагаар худалдаалах ажээ. 400 мянган төгрөгөөс эхэлж дуудах Лениний хөшөөг авахаар хоёр компани саналаа ирүүлсэн хэмээн хотын дарга Э.Бат-Үүл “Ройтерс” агентлагт ярилцлага өгөхдөө дурдсан байна билээ. Саналаа илэрхийлсэн хоёр компанийн нэг нь хотын ойролцоох жуулчны бааз гэнэ. Тус баазад  Сталиний хөшөө ч байдаг учир Ленин багшийнхыг нэмээд тавьчихвал Зөвлөлтийн үеийн хоёр удирдагчийг зэрэгцүүлж хараад амарч зугаалж буй хүмүүст нь ч зугаатай байх бололтой.
Ноён Э.Бат-Үүл барууны мэдээллийн агентлагт ярихдаа Зөвлөлтийн үеийн хар бараан түүх, хэлмэгдүүлэлт, хавчлага мөрдлөгийг эргэн дурсаад, тэр үеийг эргэн санагдуулах ийм хөшөөг одоо хүртэл нийслэлийнхээ төвд хадгалсаар байх нь зохисгүй хэмээн үзэж буйгаа хэлжээ.
Энэхүү хөшөө байсан газарт  долдугаар сарын 1-ний үймээнд амиа алдсан таван залууд зориулсан дурсгалын хөшөө босгох эсвэл Ерөнхий сайд асан А.Амарын хөшөөг барих гэсэн хоёр хувилбар байгаа юм.