Хөвсгөл аймгийн Рашаант сумын Салхитын ам гэдэг газраас эртний хүннүчүүдийн булш олджээ. Ах, дүү 31 хүний булш МЭӨ II зуунд амьдарч байсан хүннүчүүдийнх гэнэ. ШУА-ын Түүхий хүрээлэнгийнхэн хээрийн судалгаагаараа тухайн үеийн ахуй соёл, зан заншлыг илтгэхүйц онцлог эд өлгийн зүйлсийг олсон байна. Тус хүрээлэнгийн Эртний түүх сурвалж судлалын эрхлэгч С.Өлзийбаяр уг олдворыг Хүннүчүүдийн дурсгалт олдворын хамгийн эртнийх болохыг онцлов. Булшнуудын хоёр нь тоногдоогүй, олдсон эд өлгийн зүйлсийн 80 гаруй хувь нь ясан эдлэл байсан байна. Өмнө нь олдож байгаагүй үүлэн хээ бүсний алтас, нарийн урласан сэнжтэй вааран эдлэл зэрэг гарсан аж.