Зургаадугаар сарын 21-ны өдрийн байдлаар Хөвсгөлийн уулсаас эхтэй Шишхэд, Хэнтий нурууны баруун хажуугаас усжих Хараа, Тэрэлж, Туул, Шарын гол, Зэлтэр болон зүүн хажуугийн Хэрлэн, Хангай нурууны арын Идэр, Орхон, Хөгшин Орхон, өврийн Богд, Зэгстэй зэрэг голуудын усны түвшин өмнөх өдрийнхөөс 10-50 см нэмэгдэж, Хариг, Идэр, Хөгшин Орхон, Хэрлэн, Сэлбэ зэрэг голууд үерийн түвшинг 5-30 см даван үерлэж, Буянт, Ховд голууд үерийн аюултай түвшинд хүрсэн байдалтай байна. Мөн Хөвсгөлийн уулсаас эхтэй Үүр голын усны түвшин өмнөх өдрийнхөөс 120 см нэмэгдэж, үерийн түвшинг 5 см орчим даван хүчтэй үерлэж байна.
Маргааш Туул гол Улаанбаатар хот орчимд усны түвшин 25 см, Алтанбулаг сум орчимд 35 см, Хэрлэн голын эхээр 10-20 см тус тус нэмэгдэх төлөвтэй байна.
Ойрын өдрүүдэд нутгийн төв болон зүүн хэсгээр түр зуурын болон үргэлжилсэн бороо орох тул Хэнтий нуруунаас эхтэй гол мөрний усны түвшин тухайн хугацаанд орсон хур борооны эрчимшил хэмжээнээс хамааран богино хугацаанд огцом нэмэгдэх нөхцөл бүрдэж байна.
Иймд Төв, Хэнтий, Дорнод аймгаар урсан өнгөрөх гол мөрний сав дагуу суурьшиж буй ард иргэд голын эрэг хөвөө дагуу бууж суурьшихгүй байх, бага насны хүүхдүүдэд тавих хараа хяналтаа сайжруулах , голын татам хөвөө болон үерийн аманд бууж суурьшихгүй байх, баталгаатай гарам гүүрээр гарах, хот суурин газрын үерийн ус зайлуулах суваг, хоолойгоор ус чөлөөтэй урсах нөхцөлийг бүрдүүлэх, хамгаалалтын далангийн бэлэн байдлыг хангах, бусад урьдчилан сэргийлэх арга хэмжээг авч ажиллахыг зөвлөж байна.
Нийтэлсэн: Цаг Уур Орчны Шинжилгээний Газар
