Нийслэлийн Биеийн тамир, спортын газрын үйл ажиллагаа болон тус салбарт тулгамдаж байгаа асуудлын талаар хэлэлцэх уулзалт боллоо. Уулзалтад Нийслэлийн Засаг даргын Нийгмийн хөгжил, боловсрол, эрүүл мэндийн асуудал хариуцсан орлогч З.Төмөртөмөө, дүүргүүдийн асуудал хариуцсан Засаг даргын орлогч нар болон НЗДТГ-ын Нийгмийн бодлогын хэлтсийн дарга И.Баатархүү, Нийслэлийн Биеийн тамир, спортын газрын дарга Ж.Ганболд болон албаны хүмүүс оролцсон юм.

Энэ үеэр Нийслэлийн Биеийн тамир, спортын газар 2019-2021 онд хэрэгжүүлсэн ажлын тайлангаа танилцуулж, цаашид нийтийн биеийн тамир, спортын чиглэлээр төрөөс баримтлах бодлого, тулгамдаж буй асуудал, иргэдийг дасгал хөдөлгөөн хийхэд уриалах, нөхцөл боломжийг бүрдүүлэх талаар санал солилцов.