УИХ-ын өнөөдрийн хуралдаанаар Нийгмийн даатгалын тухай хуульд нэмэлт, өөрчлөлт оруулах тухай, Нийгмийн халамжийн тухай хуульд нэмэлт, өөрчлөлт оруулах тухай хуулийн төслүүдийг хэлэлцэв. Одоо мөрдөж байгаа хуульд “аймаг, нийслэл, дүүргийн нийгмийн халамжийн үйлчилгээний байгууллагын даргыг нийгмийн халамжийн асуудал эрхэлсэн төрийн захиргааны байгууллагын даргатай зөвшилцөн тухайн шатны Засаг дарга томилж, чөлөөлнө” гэж заасан байдаг. Тэгвэл хуулийн төсөлд “аймаг, нийслэл, дүүргийн нийгмийн халамжийн үйлчилгээний байгууллагын даргыг нийгмийн халамжийн асуудал эрхэлсэн төрийн захиргааны байгууллагын дарга чөлөөлж, томилно” гэж өөрчлөхөөр тусгажээ. Хуульд ийм зохицуулалт оруулж өгөхгүй бол Засаг дарга нар нийгмийн халамжийг улс төрийн зорилгоор ашигладаг, түүнчлэн улс төрийн томилгоо хийдэг гэж төсөл санаачлагч УИХ-ын гишүүн С.Эрдэнэ үзэж буйгаа илэрхийлэв. Ийнхүү Нийгмийн халамжийн байгууллагыг босоо удирдлагатай болгохоор хуулийн төсөлд тусгажээ.